Berat Gjimshiti ka tërhequr interesin e një prej klubeve më të mëdha turke, Beshiktashit, i cili kërkon përforcime për pjesën e dytë të sezonit pasi nga ai janë “arratisur” me kuptimin e plotë të fjalës disa prej futbollistëve kryesorë. Kriza ekonomike që ka mbërthyer klubin turk ka sjellë mospagesën e detyrimeve ndaj futbollistëve e për këtë arsye, emra si Pepe e Roko i kanë dhënë lamtumirën klubit gjatë javëve të fundit, me shumë lojtarë të tjerë të njohur që pritet të marrin të njëjtën rrugë.
Ndaj drejtuesit e klubit kanë filluar kërkimin për alternativa me kosto më të ulët, për të përballuar situatën në vijim. Në një vizitë në Milano për të diskutuar transferimin e futbollistëve me menaxherin serb Milosh Malenoviç, ky i fundit u ka propozuar drejtuesve të Beshiktash Gjimshitin, i cili ka eksperiencë ndërkombëtare dhe ka treguar me fanellën e Atalantës e Shqipërisë se mund të luajë në nivelet më të larta. Sipas informacioneve të “Fotospor”, menaxheri i ka premtuar se do të zgjidhë ai problemet që mund të lindin me Atalantën nëse do të bllokojnë transferimin e mbrojtësit, me detajet e mëtejshme që do të diskutohen në ditët në vijim nëse Gjimshiti do të pranojë ofertën për të shkuar në Turqi dhe braktisur Serinë A.
